Македонскиот тенисер Калин Ивановски го заврши настапот на ИТФ фјучрсот М15 Загреб во полуфиналната фаза, откако беше поразен од искусниот Мирза Башиќ од Босна и Херцеговина со 2-0 во сетови (6-4, 6-4) по 95 минути игра.
Мечот беше крајно изедначен (вкупно 67:61 во поени), но пресуди поголемата искуствена стабилност на 33-годишниот Башиќ. Во првиот сет, одлучувачки беше брејкот во петтиот гем, со кој Башиќ поведе со 3:2 и ја задржа предноста до крајот.
Во вториот сет се водеше поголема борба. Башиќ повторно дојде до брејк во петтиот гем, но Ивановски веднаш возврати со ри-брејк за 3:3. Сепак, при 4:4, Башиќ направи уште еден брејк, а во следниот гем Ивановски имаше можност да се врати со брејк топка, но противникот ја спаси и го затвори мечот во своја корист.
И покрај поразот, настапот во Загреб претставува солиден резултат за Калин, кој од понеделник ќе настапи на нов турнир – Челинџер 50 во францускиот град Троа.
