Актуелниот македонски шампион во женскиот ракомет, ЖРК Ѓорче Петров, продолжува со креирање конкурентски состав за новата сезона. Клубот од Ѓорче ја потврди продолжената соработка со двете интернационалки од Гвинеја – Санкон Кадиату и Камара Мацире, кои ќе останат дел од „лавиците“ и во сезоната 2025/26.
Кадиату, која има 20 години, игра на позицијата десно крило, додека Мацире, која е 19-годишна ракометарка, настапува како десен бек. Двете странски засилувања пристигнаа на стартот на минатата сезона, се покажаа како значајни фигури во ростерот на Ѓорче Петров и настапија на двата европски натпревари во Лигата на Европа, како и во домашниот шампионат.
Со нивното останување, клубот ја задржува јадрицата од шампионскиот тим и испраќа јасна порака дека целите остануваат високи и во новата натпреварувачка година.
Во меѓувреме, клубот веќе ги потврди и продолжените договори со Бразилската голманка Флавија Габина, Емилијана Ризоска, Мила Ѓорѓиевска, како и со Милица Николиќ, Катерина Дамјаноска и Ива Велкова.
Дополнително, Ѓорче Петров ги промовираше новите засилувања, меѓу кои се сестрите Борјана и Бојана Коцева, голманката Марија Јовановски, Стефанија Ѓорѓиевска (лево крило), пивотот Анастасија Трпеска, како и бугарската интернационалка Стефани Пламен Петрова.
Со стратегија за стабилност и засилување во клучни линии, Ѓорче Петров продолжува да гради тим кој ќе биде конкурентен и на домашна, но и на европска сцена.
