Во рамки на 3. коло од Трета лига – Исток се одигра големото мега регионално дерби во Делчево каде Брегалница се соочи со Слога од Виница во меч каде гостинот од Виница забележа убедлива победа од 0:3 и лесно прокнижи три бодови. Наместо дерби лесна победа за гостинот, кој потврдува уште еднаш зошто е прв фаворит за првото место и баражот за Втора лига.
Воинов по само една минута игра погоди за 0:1 и рано водство на Слога, а во 33. минута Ристовски постигна гол за 0:2 на полувреме. Во вториот дел притисокот беше кај Брегалница Делчево, која бркаше два гола негатива, но Амедов во 63. минута постигна гол за 0:3, а воедно и го постави конечните резултат.
Карбинци на домашен терен се соочи со екипата на Хоризонт Турново, каде епилогот беше поделба на бодовите откако двете екипи ремизираа играјќи 1:1. По мирните мрежи во првиот дел, во второто полувреме Велинов постигна гол за 1:0 и водство на домашниот тим во 63. минута, а гостинот преку Черкезов во 75. минута дојде до конечните 1:1.
Овче Поле на домашен терен играше со Дојранско Езеро каде ремизираше откако одигра 1:1. Гостинот од Дојран преку Илиев дојде до водство од 0:1 во 23. минута, а пак Стојановски во 37. минута постигна гол за конечни 1:1.
Тиверија во Струмица го пречека новиот третолигашот Светлост од Зрновци, каде струмичани со 4:0 го декласираа противникот. Васко Трајков во 17. минута погоди за 1:0 на полувреме. Во вториот дел Шилинов со два погодоци зголеми на 3:0, а пак Никола Трајков во 84. минута ги постави конечните 4:0.
Во Берово се соочија Малеш и Ударник од пирава во дуел за прв сезонски триумф каде гостинот од Пирава запиша убедлива победа од 0:3 среде Берово. Павлов погоди за 0:1, а пак Спасиќ за 0:2 на полувреме. Во судиското надополнување на мечот Спасиќ со втор гол ги постави конечните 0:3.
