Екипата на Каменица Саса остана без најдобриот стрелец од претходната сезона, Андреј Симевски кариерата ја продолжува во нова средина.
28-годишниот фудбалер постигна 15 погодоци за „рударите“ од Македонска Каменица, а фудбалерот од Пехчево веќе е на радарот на неколку екипи од Македонија, но и од странство.
Како што ексклузивно дознава Спортска Мрежа, на адресата на Симевски пристигнале две понуди од екипите од Првата македонска фудбалска лига, а сериозно сакаат неговиот потпис да го обезбедат и две екипи од Втора лига кои ќе градат тим за Прва лига.
Дополнително според нашите информации, за Симевски интерес има и од странство, пристигнале неколку понуди од странски екипи, па пред најдобриот стрелец на Саса за претходната година е период кога ќе треба да одлучува која понуда ќе биде најдобра со цел таму да ја продолжи својата кариера.
„Бомбардерот“ кој ги „решаташе“ мрежите во Втората лига, низ својата кариера има играно и за Кит Го од Пехчево, Детонит Плачковица, Каменица Саса, Малеш, Слога Виница, Беласица и Черноморец Бургас од Бугарија.
