Македонскиот репрезентативец Филип Савовски од следната сезона ќе настапува за грчкиот шампион Панатинаикос. Средниот блокер и клубот се договорија на едногодишна соработка, што претставува значаен чекор напред во неговата интернационална кариера.
„Претставува посебно задоволство, но и најголем предизвик досега во кариерата потписот со Панатинаикос. Станува збор за клуб со голема традиција, актуелен шампион на Грција, и не се сомневам дека целите ќе бидат високо поставени и во новата сезона. Особено ме радува тоа што ќе имаме настапи во Лигата на шампионите тоа за мене е ново искуство и можност за личен и професионален напредок. Се договоривме на едногодишна соработка и се надевам на успешна, а пред сè здрава сезона“, изјави Савовски.
Савовски својата кариера ја започна во Весна Пробиштип, а потоа настапуваше за Струмица , со која ја освои двојната круна во македонското првенство. Неговиот прв интернационален ангажман беше во српските клубови Војводина и Нови Сад, каде стекна драгоцено искуство на европско ниво.
Сега, со дресот на Панатинаикос и настапите во Лигата на шампионите, Савовски добива нова можност за пробив меѓу елитата на европската одбојка.
Виолета Јанчева, Спортска Мрежа
