Ончев даде 12 гола за Работнички, но победата ја однесе Јуниор Кисела Вода

Ракометарите на Јуниор Кисела Вода се израдуваа на првата победа во плеј-аутот, откако на домашен терен одиграа фантастичен натпревар и со високи 32:25 беа подобри од Работнички во 3. коло плеј-аутот од Супер лигата.

Јуниор КВ во текот на целиот натпревар имаше контрола над резултатот. Натпреварот стартуваше со водство на Работнички, по што домашниот тим го сврте и имаше плус три при 7:4. Водството беше на страната на Јуниор КВ и на полувреме екипата имаше водство од три гола при 15:12.

Во вториот дел ракометарите на Јуниор Кисела Вода одиграа одлично и не дозволија изненадување. Највисоката разлика беше седум кога, а конечниот резултат 32:25. За Јуниор КВ ова беше прв триумф, а Работнички го запиша првиот пораз.

Најдобар во редовите на домашната екипа беше десниот бек Барјактаревиќ кој постигна осум гола, а еден помалку имаше пивотот Трајковски. Кај Работнички очекувано Ончев беше најдобар со 12 гола. Во следното коло Јуниор КВ ќе гостува кај Прилеп, додека Работнички ќе биде домаќин на Астрион.