Младост 2015 ги почнува подготовките за влез во Трета лига – Север со меѓународен натпревар против Раднички од Текија (ФОТО)

Есенскиот шампион во ОФЛ Куманово екипата на Младост има амбиции оваа година за влез во Трета лига – Север, по неколку добиени дерби натпревари и без пораз со право атакува на Трета лига – Север и се наметнува како главен фаворит.

Закажаниот меѓународен натпревар со Раднички од Текија, Србија ќе биде вистински тест и овој натпревар е еден од ретките во Македонија кој ќе го игра екипа од Општинска лига. Контролниот натпревар е закажан на 28. февруари и истиот ќе биде одигран на стадионот на Младост во Долно Коњаре.

Младост одигра фантастична есенска полусезона и со 23 освоени бодови, без ниту еден пораз е лидер во ОФЛ Куманово. Главниот фаворит за промоција во Третата лига – Север има пет бодови предност пред второпласираниот Куманово 2012.

Во изјава за Спортска Мрежа, од Младост велат дека се задоволни од постигнатите одлични резултати и дека „костурот“ на екипата на чело со извонредниот Никица Петрушевски е сочуван и истиот е засилен со осум квалитетни засилувања за пролетните предизвици.

„Нашата екипа одигра извонредна полусезона и резултатите тоа го покажуваат, имаме неверојатен скор со преку 30 голови во 9 натпревари и се уште сме без пораз тоа покажува дека со право сме есенски шампиони. Најбитното е дека костурот на екипата е сочуван на чело со извонредниот Никица Петрушевски, немаме играчи кои ќе заминат од клубот, но затоа имаме 8 нови засилувања, имаме нови засилувања од странство и пред се сакаме да напоменеме дека играчите се сите до 20 години. Уште посилни сме во одбраната со Милош Алексиќ и Теодор Стојановски и на голот со Марио Цветановски, во нападот сме посилни со брзоногиот Дамјан Арсовски и корпулентниот Милан Благојевиќ и после долги преговори на излезна врата од Речица е и Душан Митиќ – Курц“, велат од клубот и додаваат:

„Амбиции и цели за пролетната полусезона е да одржиме континуитет и да се подобриме уште повеќе. Подготовките ги почнуваме од 21. февруари и имаме договорено уште неколку контролни натпревари од кои веќе го издвоивме меѓународниот со Раднички од Текија.“

Младост пролетната полусезона ја стартува против Победа од Тромеѓа на 14. март.