Македонија со најдобро прво полувреме, но Белорусија се радуваше и со пораз го завршивме СП!

Ракометната репрезентација на Македонија загуби и од Белорусија со 30:26 и со пораз го завршивме Светското првенство. Македонија во првата фаза запиша два порази од Шведска и Египет, а победа со Чиле. Во главната фаза имавме три порази од Словенија, Русија и Белорусија.

На Светското првенство на кое игравме како прва замена за Чешка, ќе го забележи најлошиот пласман на големата сцена.

Натпреварот го стартувавме со интервенција на Никола Митревски, а во нападот кој го организиравме не успеавме да реализираме. Наспротивната страна Белорусија погоди и го отвори резултатот на натпреварот со 1:0. Димитриоски со осмиот гол на шампионатот израмни на 1:1. До 6. минута Митревски ја запиша втората интервеција, а Лазаров со атрактивен гол израмни на 2:2.

Првото исклучувања на натпреварот го имаше Бохан во 8. минута од натпреварот, а резултатот беше 3:3. По третата интеверција на Митревски, Марковски погоди од гол на гол за прво водство на Македонија од 3:4. Новата интервенција на Митревски и погодокот на Поповски ни донесе водство од +2 на натпреварот при 3:5. До 13. минута Белорусија ја стопи нашата предност и резултатот беше 5:5. Поповски со вториот гол на натпреварот го врати водството на Македонија од 5:6. Со одличен гол Кулак донесе ново израмнување на 6:6. Капитенот Лазаров преку првиот седмерец на натпреварот за нашата репрезентација во 16. минута донесе ново водство од 6:7.

Македонија во 18. минута доби втор седмерец, а капитенот Лазаров успешно погоди за 8:9 и повторно водство на нашите ракометари. До 23. минута резултатот беше 10:10. Нашата репрезентација преку капитенот Лазаров го врати водството од 10:11, а на спротивната страна Белорусија брзо израмни на 11:11, со гол постигнат од седмерец, а успешно реализираше Вајлупау.

До 28. минута резултатот беше 13:13 и се играше гол за гол. Со нов атрактивен гол Кузмановски донесе ново водство на Македонија од 13:14 на минута до крајот на прво полувреме. Селекторот на Белорусија, Шевцов побара тајм-аут на 50 секунди до крајот од првиот дел кога Белорусија имаше напад за израмнување. Гајдученко постигна гол за 14:14, а Македонија во последните секунди од натпреварот имаше напад за водство, но не успаевме да реализираме и на полувреме се замина со 14:14.

Македонија одигра квалитетно прво полувреме, со повеќе желба и агресивност, со повеќе енергија и одлична одбрана. Во првиот дел капитенот Лазаров беше најдобар стрелец со 6 гола, додека кај Белорусија најмногу се истакнаа Кулеш и Вајлупау со по три гола.

Натпреварот започна со два брзи гола на Кулеш и прво водство на Белорија од два гола на натпреварот при 16:14.

До 42. минута Македонија израмни на 20:20 со гол на Кузмановски, кој потоа доби и две минути и нашата репрезентација остана без играч во поле. Исклучувањето на Кузмановски негативно влијаеше врз нашата игра и Македонија повторно губеше со два разлика до 44. минута. „Падна“ нашиот напад и грешките на нашите ракометари противникот ги користеше со што Белорусија дојде до 23:20 со гол на Астрашапкин за плус 3. Ракометарите на Белорусија направија серија од 3:0. Одличната серија на Белорија продолжи и водството се зголеми на четири разлика, по што Брестовац повика тајм-аут. До 51. минута резултатот беше 26:22.

Томовски ја запиша првата интеревенција, а во нападот реализиравме преку Цветан Кузмановски за 26:23 и негатива од три разлика. Расположениот Астрашапкин и донесе повторно водство на Белорусија од четири разлика при 27:23, а во нападот не реализиравме преку Лазаров. Томовски запиша нова, втора интервенција на мечот, но Талески не реализира во нападот и на шест минути до крајот Македонија имаше негатива од четири гола.

На шест минути до крајот селекторот Шевцов повика тајм-аут. Нашата реализација во нападот беше многу слаба, а противникот ја полнеше нашата мрежа и до 56. минута резултатот беше 29:23 и највисоки +6 за Белорусија. Младиот Цветан Кузмановски со два од два намали на 29:24. Костески го постигна вториот гол на натпреварот и намали на 29:25 во 58. минута од мечот, но на спротивната страна Астрашапкин постигна гол за 30:25, а со брз напад Македонија преку Пешевски дојде до 30:26. Во последните секунди од мечот Белорусија доби седмерец, но истиот не беше реалзиран.

Македонија одигра одлично прво полувреме, можеби најдоброто на Мундијалот, но во вториот дел потфрли одбраната, а потоа „падна“ и нападот, а тоа Белорусија вешто го користеше и дојде до победа од 30:26.

Играч на натпреварот со седум постигнати погодоци беше нашиот капитен Кирил Лазаров, кој беше најдобар стрелец во нашите редови, додека кај Белорусија со седум постигнати гола најефикасен беше Кулеш.