Третолигашот Слога Виница денес, пред својата публика на Градскиот стадион во Виница, ја подигна шампионската титула и со тоа го обезбеди баражот за можен влез во Втората лига.
Тимот на Емил Грнев доминираше оваа сезона и немаше конкуренција кога станува збор за првото место, па буквално се прошета низ лигата.
Тимот од Виница денес на домашен терен го одигра последниот меч против Карбинци, кој заврши со лото победа од убедливи 7:1 за шампионот. Тоше Стојанов во 11. минута го отвори резултатот за водство од 0:1, а потоа Миле Димитров си постигна автогол во 20. минута за 1:1, а до крајот на првиот дел Слога Виница направи комплетен пресврт и на полувреме имаше 3:1, откако погодија Филип Петковски и Љупчо Христовски.
Во вториот дел се распадна тимот на Карбинци, откако пресилната Слога преку нови три гола на Петковски за вкупно четири и гол на искусниот Иван Настевски – Меси обезбеди победа од 7:1.
- ШПАЛИР ВО ВИНИЦА И ДОДЕЛУВАЊЕ НА ШАМПИОНСКИОТ ПЕХАР НА СЛОГА:
Момент кој исто така треба да се забележи е тоа што голманот Антонио Столевски кој денес бранеше во вториот дел од мечот нема примено погодок откако пристигна во Виница во зимскиот преоден рок.
Во следното, последно 18. коло, Слога Виница ќе гостува во Свети Николе кај Овче Поле, а потоа ќе го чека датумот и можниот противник за баражот за Втора лига.
Речиси сите екипи се познати – покрај Слога Виница, која е шампион во Трета лига – Исток, титули освоија и Шкендија Арачиново (Север), Тетекс (Запад), Преспа од Ресен (Југозапад, пред официјална потврда), како и Големо Коњари (Југ).
Речиси сигурно е дека второлигашот Осогово од Кочани ќе игра бараж за опстанок во Втората лига.
Шампионскиот пехар на шампонот Слога Виница го додели претседателот на Општинскиот фудбалски сојуз (ОФС) Кочани, Александар Андов на капитенот на Слога Виница, Александар Илиев.
Во текот на оваа недела следете ја ексклузивната емисија на Спортска Мрежа за тоа како ќе се пополни Втората лига, откако Воска Спорт и Гостивар се откажаа од натпреварувањето во Прва лига!
Што се однесува до останатите натпревари од претпоследното 17. коло, во Делчево немаше победик и немаше погодоци, 0:0 на Брегланица и Овче Поле. Светлост Зрновци со автоголот на Ване Митев дојде до победа од минимални 1:0 над Дојранско Езеро.
Некогашниот прволигаш Хоризонт Турново со убедливи 1:4 триумфираше во Пирава над Ударник. Трајче Димитриев и Ѓорги Коцевски беа стрелци за гостинот, а резултатот го отвори Александар Тенекеџиев во 5. минута, со што значи дека Турново до победата дојде преку пресврт.
Во Струмица беа постигнати осум гола, но немаше победник откако Тиверија и Малеш ремизираа играјќи 4:4.
На полувреме екипата на Тиверија имаше водство од 2:1, откако Пандевски погоди за 1:0, а потоа Стојанов за 2:0 во 41. минута, една минута подоцна Пачемски постигна гол за 2:1 по првите 45 минути.
Во вториот дел продолжи неизвесноста откако Дестанов израмни на 2:2, а пак Пачемски со втор гол направи пресврт за 2:3. Следуваше автогол на Матеј Левков за 3:3, а потоа Пилов погоди за ново водство на гостинот од Берово за 3:4, а во 86. минута Шилинов ги постави конечните 4:4.
