Брегалница и Детонит Плачковица ремизираа без погодоци во дербито на 10. коло на Втората лига кое се одигра под рефлектори во Штип, со што „сините“ го препуштија врвот на Шкендија Арачиново.
Брегалница имаше притисок да стигне до трите бодови со цел да го сочува врвот, а Детонит Плачковица беше растеретен од таков притисок па влезе доста мотивирано на натпреварот и имаше особено одлично прво полувреме со неколку големи шанси, во однос на Брегалница која преку Дино Михолов имаше најзрела шанса да го отвори резултатот во првиот дел.
Тоа што не го искористи тимот од Радовиш за отварање на резултатот, Брегалница на стартот од вториот дел го зеде во предвид и започна поорганизирано кон голот на противникот, но не успеа да реализира, а Детонит Плачковица постигна и погодок кој беше поништен, но на крај радовишани можат да жалат и што не ги освоија трите бодови.
Во 74. минута од мечот голманот на гостинскиот тим Димитар Ѓоргиев заработи жолт картон поради задржување на време, а во 88. минута поради приговор Ѓоргиев доби втор жолт картон, автоматски и црвен картон и мораше да го напушти натпреварот.
Од игра беше повлечен Стефан Ристовски, а на негово место влезе вториот голман на Детонит Плачковица, Стефан Нанчовски кој дебитираше на голот на радовишкиот тим и се покажа во одлично светло со неколку интервенции.
Во самиот финиш Брегалница се обидуваше да креира шанси, но немаше сили, а тимот од Радовиш може да жали особено за тоа што не го реализираше во првиот дел, а Брегалница за своите моменти од играта кои не ги претвори во гол, па затоа двете екипи ги поделија бодовите, иако стратегот на радовишкиот тим вели дека било штета што не победиле во Штип.
По мечот Горан Здравков, шефот на стручниот штаб на Детонит Плачковица, истакна дека неговиот тим одиграл одличен натпревар.
„Одигравме одличен натпревар, но штета што не победивме. Во првото полувреме бевме доминантни моравме да ги искористиме шансите. Можам да кажам дека во првото полувреме одигравме перфектен натпревар, фудбалерите дадоа се од себе. На почетокот на второто полувреме малку Брегалница го зема поседот, створи некои полушанси, но сепак генерално шансите во второ полувреме ги имавме ние. Постигнавме чист гол кој што неоправдано ни беше поништен, не знам зошто и потоа во една сомнителна ситуација нашиот голман заработи втор жолт картон“, рече Здравков во изјавата за Спортска Мрежа.
„Нула“ и делба на бодовите, со што двете екипи веќе се насочуваат кон другите натпревари. Во следното коло Детонит Плачковица дома ќе игра со Новаци, а Брегалница оди кај Слога во Виница.
Во однос на табелата Шкендија Арачиново е прва со 26 бодови, втора е Брегалница со 24 бодови, трет е Охрид со 21, на четвртото место е Скопје кој има 20 бодови, следува Беласица која е петта со 19 бодови, а пак Детонит Плачковица е на 6. место со 18 бодови.
