Фудбалскиот клуб Беласица денеска официјално потврди дека Панче Стојанов е именуван за нов шеф на стручниот штаб. Одлуката следува само два дена по спогодбената разделба со досегашниот тренер Александар Стојанов, со што клубот брзо реагираше и го назначи својот нов предводник.
Стојанов е добро познато име на македонската фудбалска сцена, со богата кариера и како фудбалер и како тренер. Во тренерската кариера ја водеше Академија Пандев, а беше и дел од стручниот штаб на АП Брера, каде што во одреден период ја извршуваше и функцијата шеф на стручниот штаб.
Како фудбалер, Стојанов остави длабока трага настапувајќи за неколку македонски клубови, меѓу кои Беласица, Силекс, Ренова, Хоризонт Турново и Работнички, со што добро ја познава фудбалската средина и предизвиците во домашното првенство.
Новото поглавје во Беласица за него претставува предизвик со јасна цел – да го задржи тимот во борбата за највисоките позиции во Втората македонска лига. По осум одиграни кола, Беласица се наоѓа на третото место со 16 бодови, четири помалку од водечките Брегалница и Шкендија Арачиново.
Од клубот му посакаа топло добредојде, како и многу среќа и успеси во новата функција.
